وزارت معارف افغانستان به پاس کمک ملازم مکتب قره بلاق ولسوالی کشم ولایت بدخشان، مکتب ابتداییه قره بلاق را به نام سخی داد، تغییر نام می‌دهد.
سخی داد، ملازم این مکتب از پول شخصی‌اش برای شاگردان این مکتب، صنوف درسی اعمار کرده است.
آقای سخی داد به ارزش ۱۵۰ هزار افغانی، در این مکتب سه اتاق درسی را اعمار کرده است.
محمد میرویس بلخی، وزیر معارف افغانستان دیروز ۲۶ دسمبر (پنجم جدی) از آقای سخی داد برای کمک با شاگردان این مکتب تقدیر کرد و هدایت داد تا مکتب ابتداییه قره بلاق به نام او مسما شود.
بر اساس معلومات وزارت معارف این مرد " شب و روز با امتیاز بسیار اندک" از این مکتب مراقبت می‌کرد و تلاش به خرج می‌داد تا به مشکلات آن رسیدگی کند.
این در حالی است که چندی پیش وکیل شاه خان، باشندۀ ولسوالی تنی ولایت خوست، دو جریب زمین شخصی اش را برای اعمار مکتب دخترانه به وزارت معارف اهدا کرد.
وزارت معارف از شهروندان افغان خواسته است تا در بخش ترویج پیام و رسیدگی به چالش های فرا راه شاگردان مکاتب از همکاری دریغ نورزند.
