لینک های دسترسی

Breaking News

قرغیزستان، تاجیکستان را به ارتکاب جرایم سنگین متهم کرد 


در حالی که آتش‌بس میان قرغیزستان و تاجیکستان امروز دوم اپریل (۱۲ ثور) برقرار بود، بشکیک شهروندان تاجیکستانی را به ارتکاب جرایم درجریان درگیری‌های اخیر متهم کرد.

وزارت داخلهٔ قرغیزستان گفت که تلفات در این کشور به ۳۴ نفر رسیده است که ۳۱ نفر آن غیرنظامیان اند. این وزارت گفته است که در حدود ۱۳۰ نفر دیگر در این درگیری‌ها زخمی شده اند.

این وزارت افزوده است که علیه شهروندان تاجیکستانی ۱۱ قضیهٔ جنایی را درج کرده است که خشونت، قتل و عبور و مرور غیرقانونی از مرز در آن شامل است.

درگیری‌ها میان شهروندان این دو کشور در امتداد مرز مورد منازعه پیرامون آب و زمین یک نگرانی معمول است که اکثراً پای مرزبانان دو کشور نیز به این جدال کشانده می‌شود. اما درگیری‌هایی که پنجشنبه گذشته آغاز شد، در طول ۳۰ سال گذشته پیشینه نداشت.

تاجیکستان که در درگیری‌های اخیر نیز تلفات و خساراتی را متقبل شده است، تا اکنون تبصره‌های محدودی در این خصوص داشته است.

با آنکه آتش‌بس به روز پنجشنبه عقد شده بود،‌ هر دو طرف به روز جمعه نیز بر همدیگر گلوله باری کردند، اما پس از آنکه روسای امنیت ملی دو کشور باهم ملاقات کردند، آتش‌بس پس از چاشت شنبه عملی شد.

روسیه و اوزبیکستان گفته اند که آماده اند میان دوشنبه و بشکیک میانجی‌گری کنند.

XS
SM
MD
LG