محمد اشرف غنی، رییس جمهور افغانستان برای اشتراک در اجلاس سران سازمان همکاری‌های شانگهای، امروز پنجشنبه (۲۳ جوزا) با هیاتی بلندپایه دولتی به بیشکیک پایتخت قرغیزستان رفت.
شاه حسین مرتضوی، معاون سخنگوی ریاست جمهوری افغانستان در اعلامیه‌ای کوتاه گفته است که رییس جمهور غنی، برعلاوۀ سخنرانی در نشست سران شانگهای، در حاشیۀ این نشست با شماری از اعضای این سازمان نیز گفتگو کند.
سازمان شانگهای در سال ۲۰۰۱ برای همکاری‌های چندجانبه امنیتی، اقتصادی و فرهنگی به فعالیت آغاز کرد که اکنون اعضای آن به هشت کشور می‌رسد. چین، قزاقستان، قرغیزستان، روسیه، تاجیکستان، اوزبیکستان، هندوستان و پاکستان اعضای این سازمان استند.
افغانستان در نشست شانگهای به حیث ناظر شرکت می‌کند. برعلاوۀ افغانستان، ایران، بیلاروس و منگولیا نیز نقش ناظر در نشست‌های این سازمان را دارند.
وزارت خارجه افغانستان گفته است که حکومت برای عضویت سازمان شانگهای درخواست خود را به آن سازمان سپرده؛ اما تا اکنون روی آن بحث نشده است.
افغانستان انتظار دارد که عضویت سازمان شانگهای را به زودی کسب کند. پاکستان و هندوستان در سال ۲۰۱۷ میلادی عضویت این سازمان را به دست آوردند.
نوزدهمین نشست سران سازمان شانگهای روز پنجشنبه آغاز شد و قرار است که فردا جمعه نیز ادامه یابد.