لی کیانگ، صدر اعظم چین، به هدف آنچه بیجینگ آن را مبارزه با "تروریزم، افراط‌گرایی و جدایی‌طلبی" می‌خواند، خواستار همکاری عمیق‌تر امنیتی و استخباراتی با تاجیکستان شد.
به نقل از خبرگزاری سینهوای چین، لی روز دوشنبه ۱۹ اکتوبر در صحبت با امام علی رحمان، رییس جمهور تاجیکستان ابراز امیدواری کرد که دوشنبه برای حفاظت از شهروندان چین مقیم تاجیکستان "اقدامات قاطعی" را روی دست گیرد.
چین سرمایه‌گذاری‌های بزرگی در تاجیکستان دارد و در نزدیک به یک سال گذشته چندین شهروند چین در حملاتی در تاجیکستان کشته شدند که به گفتۀ مقام‌های دو کشور این حملات از افغانستان منشا گرفته بود.
چین از دیرزمان از سرایت خشونت به ویژه در شین‌ژیانگ که مسلمانان اویغور چینی در آن زیست دارند، بیم دارد.
گروه‌های مدافع حقوق بشر می‌گویند که چین اویغورها را به شدت سرکوب کرده و آزادی‌های مذهبی و فرهنگی آنان را محدود کرده است، اما بیجینگ هرگونه بدرفتاری با ایغورها را رد می‌کند.
دوشنبه نیز همواره از گسترش دهشت افگنی از مرزهای افغانستان به داخل افغانستان ابراز نگرانی کرده و در پنج سال گذشته که حکومت طالبان در افغانستان حاکمیت دارد، روابط پرتنشی با کابل داشته است.
تاجیکستان همچنان به خاطر قاچاق مخدرات از افغانستان به داخل این کشور و نیز استخراج غیرقانونی طلا در ساحات مرزی افغانستان هشدار داده بود.