امام علی رحمان، رییس جمهور تاجیکستان دستور داده است که ۲۰ هزار نظامی آن کشور در مرز با افغانستان مستقر شود.
آقای رحمان روز دوشنبه پنجم جولای (۱۴ سرطان) پس از تماس‌ها با شماری از رهبران کشورهای منطقه و متحدان دوشنبه به شمول محمد اشرف غنی، رییس جمهور افغانستان و ولادیمیر پوتین، رییس جمهور روسیه این دستور را صادر کرد.
کرملین با نشر بیانیه‌ای گفته است که رییس جمهور پوتین به آقای رحمان اطمینان داده است که در صورت ضرورت مسکو در تامین ثبات در مرزهای تاجیکستان با دوشنبه همکاری خواهد کرد.
مانند اکثر کشورهای آسیای مرکزی، روسیه در تاجیکستان نیز پایگاه نظامی داشته و توپ، تانک و طیاره‌های جنگی خود را در آن مستقر کرده است.
ریاست جمهوری افغانستان با نشر خبرنامه‌ای در مورد مکالمۀ تلیفونی آقای غنی و رییس جمهور رحمان نگاشته است: "دو جانب در مورد آن عده شهروندان افغان که در اثر ظلم و خشونت طالبان در مناطق مرزی با تاجیکستان به آن کشور پناه برده اند، صحبت نمودند."
همچنین دفتر ریاست جمهوری تاجیکستان با نشر اعلامیه‌ای گفته است که آقای رحمان در مورد وضعیت در ساحات هم مرز دو کشور و عبور قوای افغان به خاک تاجیکستان ابراز نگرانی کرده است.
به دنبال تشدید حملات طالبان در ولایت‌های شمالی افغانستان و گزارش‌های مبنی بر عقب نشینی بیش از ۱۰۰۰ منسوب امنیتی افغانستان به خاک تاجیکستان، مقام‌ها در دوشنبه نگران امنیت مرزهای خود شده اند.
خبرگزاری رویترز روز دوشنبه گزارش داد که مقام‌های تاجیکستان در صدد ایجاد کمپ برای کسانی اند که احتمالاً در صورت تشدید جنگ در شمال افغانستان، به تاجیکستان پناه خواهند برد.
با آغاز روند خروج قوای خارجی از افغانستان که قرار است تا تاریخ ۱۱ سپتمبر تکمیل شود، حملات طالبان در افغانستان به ویژه ولایت‌های شمالی آن کشور که با کشورهای آسیای مرکزی هم مرز است، شدت گرفته است. در چند روز اخیر طالبان کنترول چندین ولسوالی را در شمال افغانستان در دست گرفته اند که اکثر این ولسوالی‌ها با تاجیکستان هم‌مرز است.
