عبدالله عبدالله، رئیس اجرائیه افغانستان، روز پنجشنبه (۱۹ میزان) برای شرکت در هفدهمین نشست سران کشورهای سازمان شانگهای به دوشنبه پایتخت تاجیکستان سفر کرد.
فریدون خوځون، معاون سخنگوی ریاست اجرائیه افغانستان به صدای امریکا گفت که در این سفر دو روزه، برخی مقام‌های افغان آقای عبدالله را همراهی می‌کنند و آقای عبدالله، نمایندگی از افغانستان در این نشست سخنرانی خواهد کرد.
او افزود: "در آنجا روی مسایل منطقوی، مبارزه با مواد مخدر، ازبین بردن لانه‌های تروریزم در پاکستان و همچنان قطع حمایت از تروریستان و برخی مسایل دیگر صحبت می‌کند".
همچنان مبارزه مشترک با دهشت‌افگنی، گسترش همکاری و همگرایی منطقه‌یی، تطبیق افزایش روابط تجارتی و جلب حمایت کشورهای منطقه از روند صلح به مالکیت و رهبری افغانستان، از دیگر موضوعاتی است که رئیس اجرائیه افغانستان روی آنها صحبت می‌کند.
به گفتۀ معاون سخنگوی ریاست اجرائیه افغانستان، آقای عبدالله، در مورد تطبیق پروژه‌های بزرگ اقتصادی؛ چون تاپی که منطقه را وصل می‌سازد، نیز صحبت خواهد کرد.
قرار است که رئیس اجرائیه افغانستان، در حاشیه این نشست با رئیس جمهور و صدراعظم تاجیکستان و مقام‌های ارشد روسیه، چین، قزاقستان، قرغیزستان، بلاروس و هند نیز دیدارهای دوجانبه داشته باشد.
هفدهمین نشست سالانۀ سران کشورهای عضو سازمان شانگهای، روز جمعه (۲۰ میزان) برای ارزیابی وضعیت منطقه و سیاست‌های این سازمان در دوشنبه پایتخت تاجیکستان برگزار می‌شود.
