لینک های دسترسی

Breaking News

نظامیان تاجیکستانی 'عملیات ضد تروریزم' را در بدخشان راه اندازی کردند


نظامیان تاجیکستانی "عملیات ضد تروریزم" را در ولایت ناآرام بدخشان آن کشور که هم مرز با افغانستان است، راه اندازی کرده اند.

این عملیات به دنبال چند روز تظاهرات در ولایت بدخشان تاجیکستان راه اندازی می‌شود. معترضان مدعی اند که والی و شاروال بدخشان نتوانسته اند که مرگ یک فعال مدنی را در بازداشت پولیس به درستی پیگرد کنند و از این رو باید استعفا کنند.

وزارت داخلۀ تاجیکستان روز چهارشنبه ۱۸ می (۲۸ ثور) گفت که اعضای "یک گروه جنایتکار" شاهراه منتهی میان تاجیکستان و چین را مسدود کرده اند تا "ثبات اجتماعی سیاسی" را برهم بزنند. به گفتۀ مقام‌های تاجیک، زمانیکه پولیس به خاطر باز کردن شاهراه دست به کار شد، معترضان با پولیس درگیر شدند.

شاهدان عینی به رسانه‌های محلی تاجیکستان گفته اند در جریان برخورد میان پولیس و معترضان، چندین معترض زخمی شده اند. وزارت داخلۀ تاجیکستان روز سه شنبه گزارش داد که در جریان این تظاهرات یک معترض کشته و سه منسوب پولیس زخمی شده است.

وزارت داخلۀ تاجیکستان بدون ارایۀ مدارک و گرفتن نام کدام گروهی مدعی شده است که تظاهرات در ولایت بدخشان آن کشور از سوی "گروه‌های تروریستی بین‌المللی" حمایت می‌شود که به معترضان تاجیک اسلحه و مهمات فراهم کرده و نیز نمایندگان شان را برای "انجام اعمال تروریستی" به ساحه اعزام کرده اند.

اما معترضان می‌گویند که اعتراضات آنان مسالمت‌آمیز و حق مدنی شان است.

گروه‌های مخالف حکومت تاجیکستان در بیرون از آن کشور از مقام‌های تاجیک خواسته اند تا آنچه را به گفتۀ آنان "سرکوب اعتراضات مسالمت‌آمیز" در بدخشان است، متوقف کنند.

وضعیت در ولایت بدخشان تاجیکستان که هم مرز با افغانستان است، از ماه نومبر ۲۰۲۱ به اینسو پرتنش و ناآرام بوده است. یکبار معترضان کوشیدند که ساختمان‌های دولتی را در این ولایت تصرف کنند، اما پولیس مانع آنان شد و در اثر گلوله باری پولیس یک معترض کشته شد.

تظاهرات در تاجیکستان که ۹.۵ میلیون نفر جمعیت دارد، رویداد بسیار نادر است. اما ولایت بدخشان تاجیکستان که اکثر مخالفان حکومت در آن لانه دارند، هرازگاهی شاهد تظاهرات بوده است.

با آنکه ولایت بدخشان تاجیکستان نصف قلمرو آن کشور را تشکیل می‌دهد، جمعیت این ولایت فقط حدود ۲۵۰ هزار نفر است. اکثر ساحات بدخشان کوهستانی بوده و شرایط زندگی در آن به دلیل مشکلات اقتصادی، میزان بلند بیکاری و بهای بلند مواد خوراکی، دشوار است.

در تهیۀ این مطلب از گزارش‌ خبرگزاری رویترز و رادیو اروپای آزاد استفاده شده است.

XS
SM
MD
LG