لینک های دسترسی

Breaking News

تاجیکستان: سربازان تاجیک پنج تندرو را در بدخشان کشتند


حکومت تاجیکستان می‌گوید که امروز سه شنبه ۳۱ می (۱۰ جوزا) در جریان عملیات مبارزه با تروریزم در نزدیکی منطقهٔ مرزی با افغانستان و چین، نیروهای این کشور پنج تروریست را کشتند.

وزارت داخلهٔ تاجیکستان گفته است که اعضای یک "گروه تروریستی و جرایم سازمان یافته" پس از آن کشته شدند که نخواستند به نیروهای امنیتی تسلیم شوند.

تاجیکستان در اوایل ماه جاری عملیات مبارزه با تروریزم را پس از تظاهرات در منطقهٔ خود مختار گورنو بدخشان اعلام کرد؛ منطقه‌ای که دوشنبه برای کنترول آن جد و جهد داشته است.

با این حساب، شمار تلفات به میان آمده در این عملیات به ۱۴ نفر رسید، با وجود آنکه ارقام غیر رسمی میزان تلفات را بیشتر از این نشان می‌دهد.

بر اساس معلومات دولتی، در این جریان یک تن از نیروهای امنیتی تاجیکستان کشته شده است.

بروز خصومت‌های ناگهانی در این منطقهٔ کوهستانی نگرانی‌های حکومت‌های غربی و گروه‌های حقوق بشری را پی داشته است. آنان می‌گویند که با منطقهٔ گورنو بدخشان هیچ نوع ارتباط وجود ندارد به این معنی که واضح نیست در آنجا چه می‌گذرد.

گورنو بدخشان پس از جنگ پنج سالهٔ داخلی دههٔ‌ ۱۹۹۰ هر از گاهی صحنۀ خشونت و ناامنی بوده است.

حکومت تاجیکستان می‌گوید که پس از کشته شدن محمد باقر محمد باقروف، یکی از مخالفین اصلی حکومت در درگیری‌های داخلی گروه‌های جنایت‌پیشه، هراس درگیری‌های بیشتر در این منطقه به میان آمده است.

در سال ۲۰۱۲ در جریان عملیات اردوی تاجیکستان نیز ده‌ها نفر در این منطقه کشته شدند.

با آنکه منطقهٔ گورنو بدخشان تاجیکستان نصف قلمرو آن کشور را تشکیل می‌دهد، جمعیت این ولایت فقط حدود ۲۵۰ هزار نفر است. اکثر ساحات آن کوهستانی بوده و شرایط زندگی در آن به دلیل مشکلات اقتصادی، میزان بلند بیکاری و بهای بلند مواد خوراکی، دشوار است.

XS
SM
MD
LG