به روستانشینان ساحات مرزی تاجیکستان با افغانستان گفته شده است که در صورت تلاش تندروان برای ورود به مناطق شان، باید آمادۀ "برداشتن اسلحه" باشند.
پاچاخان ظریف‌زاده، حکمران ساحۀ شمس‌الدین شاهین تاجیکستان گفته است که در نشستی با باشندگان آن ساحه، به شمول نیروهای امنیتی و شکارچیان، در مورد وضعیت امنیتی صحبت شده است.
آقای ظریف‌زاده در این نشست گفته است: "در هماهنگی با ادارات پولیس و استخبارات، تمام شکارچیانی را که در ساحات مرزی زندگی می‌کنند، ثبت و راجستر کرده ایم. آنان باید برای دفاع از کشورمان سلاح بردارند. در واقع، اگر وضعیت حکم کند، تمام ما باید سلاح برداریم."
به نقل از رادیو اروپای آزاد/ رادیو آزادی، دستور مشابه به باشندگان سایر محلات هم مرز تاجیکستان با افغانستان نیز داده شده است.با اینحال، مقام‌ها در مورد طرح آموزش و تسلیح مردان محلی برای دفاع از مرز تاجیکستان، جزییاتی ارایه نکرده اند.
این در حالی است که در ماه‌های اخیر درگیری میان نیروهای امنیتی و دفاعی افغان با طالبان در ساحات نزدیک میان مرز افغانستان-تاجیکستان شدت یافته است.
مرزهای کوهستانی شمس‌الدین شاهین تاجیکستان با افغانستان که ۱۱۲ کیلومتر طول دارد، یکی از چالش‌های بزرگ کنترول مرزی برای مرزبانان تاجیکستانی است.
باشندگان اکثر روستاهای مرزی تاجیکستان، صدای رگبار گلوله‌هایی را می‌شنوند که نیروهای امنیتی افغان و طالبان بر یک‌دیگر شلیک می‌کنند و حتا بیم دارند که مبادا گلوله‌های سرگردان و توپ و هاوان به خانه و روستای شان اصابت کند.
دو هفته پیش، چندین گلولۀ سبک و سنگین که از خاک افغانستان شلیک شده بود، در حیاط خانۀ دو باشنده و یک مکتب در روستایی در ولایت درواز تاجیکستان اصابت کرد.
مقام‌های افغان هشدار داده اند که شمار زیاد جنگجویان تاجیکستانی در صفوف تندروان بر ضد نیروهای امنیتی و دفاعی افغان می‌جنگند.
پس از درگیری تاریخ ۲۴ فبروری در یک ساحۀ مرزی افغانستان که منجر به کشته شدن چندین تندرو شورشی شد، زین‌العابدین، حکمران ناحیۀ نسی ولایت درواز تاجیکستان به رادیو اروپای آزاد گفت که دو شهروند تاجیکستان نیز در میان تندروان کشته شده شامل اند.
مقام‌های محلی ساحات مرزی تاجیکستان به شمول زین‌العابدین از حکومت مرکزی تاجیکستان خواستار همکاری برای مقابله با تندروان و آن عده شهروندان تاجیک شده اند که با طالبان و گروه دولت اسلامی در افغانستان رابطه و علایق دارند.
مقام‌های افغان گفته اند که حدود ۲۰۰ جنگجوی تاجیکستانی در صفوف تندروان مخالف دولت افغانستان می‌رزمند، اما تایید مستقل این آمار ممکن نیست.
تاجیکستان که ۱۳۶۰ کیلومتر مرز با افغانستان دارد، از دیرزمان در مورد انسجام و تمرکز تندروان، به شمول شهروندان کشورهای آسیای مرکزی، در افغانستان نگرانی داشته است.
در دسمبر گذشته، تاجیکستان نیروهای اضافی را زمانی در مرز آن کشور با افغانستان مستقر کرد که گزارش‌هایی در مورد همکاری گروه‌های تندرو تاجیکستانی با طالبان برای تصرف یک ولسوالی مرزی افغانستان نشر شد.
چندی پیش یک ویدیو ده دقیقه‌ای در شبکه‌های اجتماعی نشر شد که گویا شورشیان تاجیکستانی را در جریان جنگ با نیروهای افغان در ولسوالی مایمی بدخشان افغانستان نشان می‌داد. در این ویدیو شورشیان که با لهجۀ فارسی تاجیکی صحبت می‌کردند، مردانی با یونیفورم قوای امنیتی و دفاعی افغان را به گلوله بسته و یک ساختمان را به آتش می‌کشند.
چند روز پس از نشر این نوار ویدیویی، مسوولان امنیتی تاجیکستان کم از کم ۱۵ شهروند آن کشور را شناسایی کردند که در این ویدیو دیده شده یا نام های آنان شامل فهرست تندروانی بود که از سوی مقام‌های افغان نشر شده بود.
مقام‌های افغان گفته اند که شورشیان تاجیکستانی که بر ولسوالی مایمی حمله کرده بودند، اعضای گروه تندرو جماعت انصارالله اند. جماعت انصارالله در سال ۲۰۱۰ توسط امرالدین تباروف، تندرو تاجیک اساس گذاشته شد. تباروف در جولای ۲۰۱۵ توسط نیروهای افغان کشته شد.
