حکومت طالبان نگرانی‌های ولادیمیر پوتین، رییس جمهور روسیه دربارۀ وضعیت امنیتی در مرز میان افغانستان و تاجیکستان را "بیجا" خوانده و می‌گوید که هیچ تهدیدی از افغانستان متوجۀ کشورهای منطقه نیست.
انعام‌الله سمنگانی، معاون سخنگوی این وزارت روز سه‌شنبه ۲۸ دسمبر (هفتم جدی) با فرستادن یک پیام صوتی به خبرنگاران گفت که هیچ "تهدید بل‌الفعل و بل‌القوه" از افغانستان به کشورهای همسایه و منطقه متوجه نیست.
ولادیمیر پوتین، رییس جمهور روسیه در ملاقات با امام علی رحمان، رییس جمهور تاجیکستان گفته است که وضعیت امنیتی در مرز افغانستان و تاجیکستان نگران کننده است.
آقای پوتین خطاب به رییس جمهور تاجیکستان گفت: "طبق توافق ما، مقداری تسلیحات و تجهیزات برای تقویت نیروهای مسلح تاجیکستان تحویل داده شده است تا تاجیکستان بتواند به طور موثر با هر گونه تهدیدی مقابله کند که از خارج برای کشور شما سرچشمه می‌گیرد."
آقای سمنگانی افزود: "امارت اسلامی افغانستان ...چنانکه در داخل کشور امنیت را تامین کرده از مرزهای کشور هم حراست و حفاظت می‌کند و نگرانی‌هاییکه در این مورد مطرح می‌شود بیجا است."
معاون سخنگوی طالبان همچنین گفت که تا کنون هیچ تهدیدی از افغانستان به کشورهای همسایه و منطقه پیش نشده است و آنان برای تامین امنیت مرزهای این کشور متعهد اند.
تاجیکستان که بیش از ۱۳۵۷کیلومتر مرز با افغانستان دارد، بارها نگرانی خود را در مورد جنگ و ناامنی در افغانستان و گسترش و نفوذ دهشت افگنان از این کشور به تاجیکستان ابراز کرده است.
پس از تسلط طالبان بر افغانستان، نظامیان روسیه در تاجیکستان تمرینات نظامی را راه اندازی کرده و پایگاه‌های نظامی خویش را تقویت کرد.
روسیه در ماه جاری اعلام کرد که پایگاه نظامی خود در تاجیکستان را با ۳۰ تانک جدید تقویت می‌کند و نیروهایش تمرینات نظامی با سیستم‌های دفاع میزاییل را در تاجیکستان انجام داده اند.
